திமுக ஊழல் பட்டியல்: தவெக அரசின் கவனத்திற்குக் கொண்டு வந்த அண்ணாமலை!

முறைகேடு புகாரில் சிக்கிய முன்னாள் அமைச்சர் எ.வ.வேலு மீது வழக்குப்பதிவு செய்யப்பட்டுச் சோதனை நடத்தப்பட்ட நடவடிக்கையை வரவேற்பதாக 'We The Leaders' அமைப்பின் தலைவர் அண்ணாமலை தெரிவித்துள்ளார்.

இதுதொடர்பாக அண்ணாமலை தனது எக்ஸ் சமூக ஊடகப் பக்கத்தில் வெளியிட்டுள்ள பதிவில், குற்றவாளிகள் எனக் கண்டறியப்பட்டவர்கள் சட்டப்படி தண்டிக்கப்படுவார்கள் என நம்புவதாகக் குறிப்பிட்டுள்ளார். மேலும், எ.வ.வேலு மட்டுமின்றி கடந்த 5 ஆண்டு கால திமுக ஆட்சியில் நடந்த பல்வேறு ஊழல் புகார்களைத் தற்போதைய தவெக (தமிழக வெற்றிக் கழகம்) அரசின் கவனத்திற்குக் கொண்டு வர விரும்புவதாகவும் அவர் தெரிவித்துள்ளார்.

அண்ணாமலை தனது பதிவில் பட்டியலிட்டுள்ள முக்கிய முறைகேடு புகார்கள்:

பிஜிஆர் எனர்ஜி விவகாரம் மற்றும் ஊட்டச்சத்து கிட் கொள்முதல் முறைகேடுகள்.

பொங்கல் பண்டிகைக்கு வேட்டி, சேலை வழங்கியதில் நடந்த முறைகேடு.

போக்குவரத்துத் துறையில் பிரதிபலிப்பு மற்றும் பின்புற அடையாளத் தகடுகள் கொள்முதல் செய்ததில் முறைகேடுகள்.

தமிழ்நாடு தேசிய ஊரக வேலை உறுதித் திட்டம் (100 நாள் வேலைத் திட்டம்) மற்றும் பூச்சிக்கொல்லிகள் கொள்முதல் செய்ததில் நடைபெற்ற முறைகேடுகள்.

உதயநிதி ரசிகர் மன்றமும், நோபல் ஸ்டீல்ஸ் என்ற தனியார் நிறுவனமும் ஒரே முகவரியில் இயங்குவதைக் குறிப்பிட்டுப் பேசியுள்ள அண்ணாமலை, மு.க.ஸ்டாலின் துபாய்க்குச் சென்று வந்த உடனேயே, அந்த நிறுவனம் ரூ.1,000 கோடி முதலீடு செய்வதாக அறிவித்தது எப்படி எனக் கேள்வி எழுப்பியுள்ளார். மேலும், அந்த ரூ.1,000 கோடி முதலீட்டு அறிவிப்பும் தற்போது வெறும் அறிவிப்பாக மட்டுமே உள்ளது என்றும், இவை குறித்துத் தவெக அரசு விரைந்து விசாரணை நடத்த நடவடிக்கை எடுக்க வேண்டும் என்றும் அவர் வலியுறுத்தியுள்ளார்.